HOW A PRETORIA GIRL BECAME A PILOT IN WORLD WAR II
Abstract
Dolores Teresa “Jackie” Sorour a young lady from Pretoria was determined to become a pilot and the first lady to use a parachute. She succeeded and became a pilot and later a pilot in the WAAF – she was a lifelong pilot.
Opsomming
Dolores Teresa “Jackie” Sorour ‘n jong dame van Pretoria was vasbeslote om ‘n vlieënier te word en die eerste dame wat ‘n valskerm sou gebruik. Sy het daarin geslaag en ‘n vlieënier en later ‘n vlieënier in die WAAF geword – sy was ‘n lewenslange vlieënier.
Sleutelwoorde
- ‘A’ vlieglisensie
- Air Transport Auxiliary (ATA)
- De Havilland Rapide
- De Havilland-fabriek
- Dolores Teresa Sorour ook bekend as Jackie Sorour
- Elias Jacob Sorour
- Jean Lennox-Bird trofee
- King’s Commendation for Services in the Air
- luitenant-kolonel Reginald Moggridge
- Queen’s Coronation Medal
- RAF-vlerke
- Royal Air Force (RAF)
- Sir Pierre van Ryneveld
- Taunton Amateur Operavereniging
- valskerm
- Veronica Johanna, ’n nooi Sarkis
- Women’s Auxiliary Air Force (WAAF)
PRETORIASE MEISIE WORD VLIEËNIER IN TWEEDE WÊRELDOORLOG
Die Bronberger-tydskrif: April 2025 (Met toestemming herpubliseer)
Angie Kleijn
Jackie Moggridge
Bron: Wikipedia
Jackie word met toerusting gehelp
Bron: rafmuseum.org.uk
Die afdeling wat net uit vroue bestaan het
Bron: rafmuseum.org.uk
Jackie die vlieënier
Bron: rafmuseum.org.uk
Die baba Dolores
Bron: jackiemoggridgespitfiregirl.com
Jackie se broers, Laurence en Eddie Pearce, Jackie Sorour, haar ma Veronica en kleinsus Rosemary
Bron: jackiemoggridgespitfiregirl.com
Jackie op haar motorfiets
Bron: jackiemoggridgespitfiregirl.com
Jackie by die Hatfield-vliegveld as ‘Air Transport Auxiliary’
Bron: jackiemoggridgespitfiregirl.com
Jackie op die voorblad van ‘Picture Post’
Bron: jackiemoggridgespitfiregirl.com
Jackie by een van die 83 verskillende soorte vliegtuie wat sy gevlieg het
Bron: jackiemoggridgespitfiregirl.com
Klankgrens-meisie
Bron: jackiemoggridgespitfiregirl.com
Jackie was lid van die Taunton Amateur Operavereniging
Bron: jackiemoggridgespitfiregirl.com
’n Ouer Jackie by die veteraan Spitfire wat sy meer as 50 jaar vantevore gevlieg het
Bron: jackiemoggridgespitfiregirl.com
’n Strokiesprent uit 1959 oor Jackie se lewe
Bron: jackiemoggridgespitfiregirl.com
Jackie met haar dogtertjie Veronica Jill
Bron: jackiemoggridgespitfiregirl.com
Jackie en Reginald Moggridge se troudag
Bron: jackiemoggridgespitfiregirl.com
Dié is die verhaal van ’n baie doelgerigte dogtertjie van Pretoria wat vasbeslote was om eendag ’n vlieënier te word, al het dit beteken dat sy wiskunde moes deurkom. Sy het haarself op die ouderdom van 14 jaar deur ’n Amerikaanse korrespondensie-vliegkursus gesit voor sy met regte vliegtuie begin vlieg het.
So het sy een van die eerste vroue-vlieëniers in Suid-Afrika geword, die eerste tienermeisie om ’n valskermsprong te doen en uiteindelik het sy vir verdere opleiding in Brittanje gegaan waar sy saam met die mans vir diens opgeroep is toe die Tweede Wêreldoorlog uitbreek.
Dolores Teresa Sorour is op 1 Maart 1920 in Schoemanstraat 136 as die dogter van Elias Jacob Sorour en Veronica Johanna, ’n nooi Sarkis, gebore. Sy het nooit haar pa Elias geken nie; hy is voor haar geboorte aan longontsteking dood. Haar ma het weer getrou, dié keer met Leonard Lawrence Pearce, en Dolores is aanvanklik deur haar ouma Helena grootgemaak.
In haar tienerjare het Dolores besluit om haarself Jackie (na die beroemde Suid-Afrikaanse hokkiespeler, Jackie Rissik) te noem en sy het nooit weer op ’n ander naam geantwoord nie. Sy het twee broers, Laurence en Eddie gehad, wat haar genadeloos geterg het en later ’n babasussie, Rosemary.
Drome
Jackie het vertel dat sy in die groot Jakarandaboom in haar ouma se voortuin geklim het en haarself verbeel het dat sy een van die Hawker Furies of Hawker Demons, wat toentertyd deur die Suid-Afrikaanse lugmag gebruik is, vlieg.
Sy het vliegtydskrifte verslind en toe sy op die ouderdom van 14 jaar sien dat ’n korrespondensie-vliegkursus adverteer word, het sy haar ma se arm gedraai om teen £1 per maand in te skryf. Jackie se ouma is drie jaar voor dit oorlede. Jackie het alles van vliegtuig-enjins geleer en het geweet hoe om hulle te teken voor sy ooit in ’n vliegtuig was. Haar sertifikaat is uiteindelik aan meneer Jackie Sorour uitgereik, alhoewel sy baie duidelik as ’n mejuffrou ingeskryf het.
As tiener het sy, teen £3 per uur, by Baragwanath-vliegveld leer vlieg. Sy mag net een uur se opleiding per week gekry het. Haar eerste solo-vlug was in die dubbelvlerk De Havilland Rapide, maar in plaas daarvan om die voorgeskrewe roete te volg, het sy Pretoria toe gevlieg en daar geland, voor sy terug is Johannesburg toe.
Valskerm
Jackie het intussen ’n motorfiets gekry en sy het Uniegebou toe gery en by die kantoor van Sir Pierre van Ryneveld, die eerste man in Suid-Afrika wat ’n valskermsprong gedoen het, ingestap. Jackie wou sy toestemming kry om die eerste vrou in die land te word om met ’n valskerm te spring.
Sir Pierre was glo so verstom dat hy ingestem het om haar te sien. Hy het egter gesê dat sy heeltemal te jonk is vir so ’n sprong, dat sy sekerlik ’n been sal breek en vir die res van haar lewe mank sal loop – soos hy. Jackie het haar nie laat oortuig nie en Sir Pierre het haar toestemming gegee om die sprong op ’n spesifieke Sondag te maak. Hy het gesorg dat sy ’n valskerm kry wat deur die SA Lugmag voorsien is.
Daardie dag in Januarie 1938 het dit glo hard gereën en ’n groot skare het opgedaag, ná die gebeurtenis oor die radio aangekondig is. Jackie het, in voorbereiding op haar sprong, op die vliegtuig se vlerk gaan staan waar sy dadelik afgewaai is omdat sy so lig was. Sy het deur die lug getuimel, maar gelukkig onthou om die toutjie te trek wat die valskerm laat oopmaak het. Kort voor sy die grond bereik het, het die valskerm ingevou en Jackie het hard op ’n poloveld geland en haar enkel gebreek.
Lisensie
Sy het haar ‘A’ vlieglisensie ontvang en wou ’n professionele vlieënier word. Om by ’n vliegklub in Suid-Afrika aan te sluit, sou beteken dat dit jare sou neem om genoeg vliegure op te bou. Die ander keuse was om na ’n duur professionele skool in Engeland te gaan. Sy het op 24 Junie 1938 na die lugvaartkollege in Oxford vertrek en het 400 vliegure agter die blad gehad toe die Tweede Wêreldoorlog op 3 September 1939 uitgebreek het.
Jackie was die enigste vrou wat ’n professionele vlieënierskursus daar gedoen het en sy is vir diens in die Royal Air Force (RAF) opgeroep. Sy het egter ’n pos in die Women’s Auxiliary Air Force (WAAF) gekry omdat daar besluit is dat sy nog te jonk is om RAF vliegtuie te vlieg. So het sy die eerste tien maande van die oorlog as radaroperateur gewerk.
Die tekort aan gekwalifiseerde vlieëniers het gou krities begin raak en op 29 Julie 1940 is Jackie na Air Transport Auxiliary (ATA) gestuur. Dit is daar waar sy haar toekomstige man, luitenant-kolonel Reginald Moggridge van die Royal Engineers, ontmoet het.
Jackie het begin om ligte vliegtuie te vlieg en was vir ’n jaar by die De Havilland-fabriek noord van Londen, waar allerhande soorte vliegtuie getoets is, gestasioneer. Sy het later by ’n afdeling wat net uit vroue bestaan het in Hamble, Southampton aangesluit. In 1940 het sy die King’s Commendation for Services in the Air ontvang. Jackie het uiteindelik meer as 1 500 vlugte in 83 verskillende vliegtuie gedoen.
Trou
Sy het in Januarie 1945 in Taunton, Somerset met luitenant-kolonel Reginald Moggridge getrou en hulle het twee dogters gehad, Candida (Candy) en Veronica Jill. ’n Mede-vlieënier het vertel dat Jackie haar eerste swangerskap vir almal weggesteek het en aanhou vlieg het tot Candy twee maande te vroeg gebore is. Ses maande daarna het sy weer begin vlieg.
Die oorlog het Jackie se ambisie om ’n professionele vlieënier te word, onderbreek. Ná die oorlog, as ’n ma, het sy haar eksamens oorgeskryf, gekwalifiseer en by die RAF vrywilliger reserwemagte aangesluit.
In 1953 het sy en vyf ander vroulike vlieëniers hulle RAF-vlerke gekry. Haar ambisie was om die eerste vrou te wees wat deur die klankgrens breek, maar omdat die RAF en private vliegorganisasies haar nie in ’n straler wou toelaat nie, het ’n Franse vrou dié voorreg gehad. Sy het wel later die kans gehad om die klankgrens te breek.
Jackie se diens in die RAF het in 1954 tot ’n einde gekom toe hulle laat weet het dat hulle nie meer vroulike vlieëniers nodig het nie. Daarná het Jackie die eerste vroulike kaptein vir passasiersvliegtuie in kommersiële lugrederye geword en het wêreldwyd gevlieg.
Sy het die Queen’s Coronation Medal ontvang en was die eerste een wat die Jean Lennox-Bird trofee ontvang het. Ná die oorlog het sy ook ’n bekwame kunstenaar by die Taunton Amateur Operavereniging geword en het tot 1979 gereeld aan opvoerings deelgeneem. Sy het opera en ballet geniet en het ook olieverf en naaldwerk gedoen.
Spitfire
Jackie het haar vlieglisensie altyd behou en het haar laaste Spitfire gevlieg toe sy 74 jaar oud was. Sy het altesaam 501 Spitfires in haar leeftyd gevlieg en in 1994 het sy, as deel van D-Day vieringe, in ’n ou Spitfire gevlieg waar haar naam in die logboek aandui dat sy die eerste mens was om daardie vliegtuig te vlieg.
Jackie het vir 46 jaar lank professioneel gevlieg. Sy het die Suid-Afrikaanse Nasionale Museum van Militêre Geskiedenis in Johannesburg in November 2001 besoek en haar storie as deel van die museum se mondelinge geskiedenis-program vertel.
Jackie is op 7 Januarie 2004 in die ouderdom van 81 jaar in Taunton, Engeland oorlede.
