Henning van Aswegen
Is Azania ‘n kommunistiese land, of nie?
‘Afsonderlike staatsinstellings, en die manier waarop ampsbekleërs hierdie teoreties-afsonderlike instellings bestuur en behartig is die meetinstrument om die verskil tussen Staatsentriese Sosialisme en Demokrasie te bepaal.’
Abstrak: Marxisme, Kommunisme, Sosialisme, Stalinisme, Trotskyïsme, Leninisme, Nasionale Sosialisme, Henning van Aswegen, Spioenmeesters, Die Buro, The Daisy Spy Ring, Russian Espionage in South Africa.
Is Suid-Afrika ‘n kommunistiese land, of nie? Was Robert Sobukwe en die Pan Africanist Congress (PAC) sedert 1959 al die tyd reg om hierdie streek aan die Suidpunt van Afrika waarin ons woon, Azania in plaas van Suid-Afrika te noem? Woon ons nou in ‘n land met die naam Suid-Afrika, of Azania wat deel is van die Sino-Russiese Aksis en onder die sambreel van Pan Afrikanisme val? ‘n Derdewêreldland wat in die Verenigde Nasies met eentonige reëlmaat saam met Rusland, Sjina, Kuba en Iran teen Westerse belange stem, en kant kies vir Hamas en ander terroriste-organisasies teen Israel?
Kom ons voer debat hieroor in Nongqai, en as u wil ‘n lekker vuurwarm argument.
‘n Kommunis as minister van Hoër Onderwys en Opleiding
President Cytil Ramaphosa se onlangse aanstelling van ‘n ongekwalifiseerde lid van die Sentrale Komitee van die Suid-Afrikaanse Kommunistiese Party, Buti Manamela as minister van Hoër Onderwys en Opleiding, skree ten hemele en hys ‘n rooi vlag oor die ANC-SAKP se beleid van Staatsentriese Sosialisme. Azaniërs is sedert 1994 al gewoond aan kaderontplooïing, en die aanstelling van boeties en sussies, niggies en nefies, seuns en dogters, oumas en oupas in senior staatsdiensposte. Amper soos Amerika se Fascistiese president Trump wat sy kinders en vriende in regeringspose aanstel het, met noodlottige gevolge.
In Azania is die gevolge en konsekwensies van kaderontplooïng en Staatsentriese Sosialisme veel erger as Trump se totalitarisme. Die ANC-SAKP se katastrofiese sosialistiese benadering tot sentrale staatsbestuur is die direkte oorsaak van ‘n weermag wat nie eers ‘n oorlog teen Lesotho, Swaziland en Malawi kan wen nie, omdat al hul wapentuig op krukke staan of iewers in Afrika gestrand is. Bewaar ons siele as daardie drie magtige Afrikalande ‘n militêre alliansie teen Azania moet vorm – dan het ons regtig geen kans om ‘n oorlog te wen nie. Die land se infrastuktuur is onherstelbaar beskadig, die ekonomie steier duiselig van een buitelandse lening na die volgende om wankelend met swak knieë staande te bly, die land se gesonheidstelsel is lewensgevaarlik en elke ANC-SAKP minister is ‘n multimiljoenêr. Nie juis ‘n wenresep nie.
Wat is die verskil tussen Staatsentriese Sosialisme, en Kommunisme?
Die eenvoudigste begripsomskrywing van Kommunisme vind ek in Karl Marx en Friedrich Engels se 1848 Komunistiese Manifes (uit Duits na Engels na Afrikaans vertaal):
As student in Hombrè Manskoshuis aan die PUK reël my wyse professore Tom Larney en CP (Seep) van der Walt dat ek in die Potch Biblioteek toegang tot Karl Marx se verbode Das Kapital kry. Vir hul vêrsiendheid is ek hulle ewig dankbaar, maar na ‘n jaar van lees aan al drie volumes was ek meer verward oor Marxisme en Kommunisme as voor die lees daarvan. Om van Vladimir Lenin, Leon Trotsky en Joseph Stalin se interpretasie van Marxisme nie eers te praat nie.
“Kommunisme veronderstel dat die staat elke ekonomiese, sosiale en politieke aktiwiteit van elke burger bepaal en beheer. Kommunisme teorotiseer dat die ware mens en die ware burger ‘n proletariër is (die werkersklas), en dat hul belange identies is met die gemeenskap of burgers van die land. Hierdie proletariërs hou hulle voltyds besig met materialistiese dialektiek, maw. dinge soos landbou en die vervaardiging van goedere.”
Staatsentriese Sosialisme, soos deur die ANC-SAKP op 24 staatsdepartemente en ‘n niksvermoedende bevolking in Azania projekteer, plaas die beginsel van gemeenskaplikheid, dws. kontrole en beheer in die hande van die proletariaat. Gelykheid word veronderstel tussen die proletariaat (werkersklas) en die bourgeoïsie (eienaarsklas). Sosialisme verwar dus die beginsel van individualiteit (kompetisie, ‘n vryemarkstelsel), met die beginsel van gemeenskaplikheid (kontrole en beheer) in ‘n nuwe ‘volksdemokrasie.’
Normatief bepaal ‘n land se konstitusie die aard en omvang van staatsinstellings wat met wetgewende, uitvoerende en regsprekende bevoegdhede belas is. Afsonderlike instellings, en die manier waarop ampsbekleërs hierdie drie afsonderlike instellings bestuur en behartig, is die meetinstrument om die verskil tussen Staatsentriese Sosialisme en Demokrasie te bepaal. Geen wonder dat kongreslid Marjory Taylor Green die kluts kwytgeraak het toe sy op televisie die verskil tussen Sosialisme en Nasionale Sosialisme probeer verduidelik het nie. Volgens haar souJoseph Stalin en Adolf Hitler groot vriende gewees het.
In plaas daarvan dat die ANC-SAKP besluitnemingsbevoegdhede aan plaaslike en streeksowerhede desentraliseer, word mag, kontrole en beheer in die hande van die ‘Sentrale Komitee’ (lees kabinet), gekonsentreer. In Azania bestaan daar nie iets soos die desentralisering van politieke besluitneming nie – “ons sal jou vertel wat om te dink.” Hierdie katastrofiese sosialistiese denkwyse is duidelik te sien in die regering se makro-ekonomiese beleid (GEAR), en die toename van staatsorganisasies (ondernemings in staatsbesit) tot ongeveer agt honderd. Met ander woorde, die staat beheer die land se makro-ekonomie.
Is Azania ‘n mislukte staat?”
Is die nuwe Republiek van Azania ‘n mislukte staat aan die Suidpunt van Afrika? Het Pan Afrikanisme reeds die ekonomie vernietig en die land weereens die etiket “muishondland” om die nek gehang? Azania se vriende (lees aksis) is deesdae BRICS, Hamas en Hezbollah, Sirië, Sjina, Rusland, Venezuela en Kuba. Die land se stemrekord sedert 1994 in die Verenigde Nasies skets ‘n sombere prentjie van rigtinglose en korttermyn stompsinnigheid – van strategiese politieke filosofie en denke is daar nie sprake nie.
Quo Vadis, Azania?
- Henning van Aswegen
- Skrywer van Propaganda, The Communist Bible, Spioenmeesters, DIE BURO, The Daisy Spy Ring, The Spymasters of South Africa, en Russian Espionage in South Africa. Verkrygbaar van Mandy@Imprimatur.co.za.
